cancel

Karobar Daily - भोलिदेखि राजधानीमा रात्रिबस

राति अबेर आवतजावत गर्नुपर्ने यात्रुलाई लक्षित गरी शुक्रबार (भोलि)देखि राजधानीमा सहरी रात्रिबस सञ्चालन हुने भएको छ । नगरवासीको सुविधा र रात्रिकालीन आर्थिक क्रियाकलापलाई मध्यनजर गरी काठमाडौं महानगरपालिका तथा नेपाल यातायात व्यवसायी राष्ट्रिय महासंघको सहकार्यमा रात्रिबस सञ्चालन गर्न लागिएको हो । उपभोक्ता संरक्षण ऐनमा राति ८ बजेसम्म सार्वजनिक यातायातका साधन सञ्चालन गर्ने प्रावधान भए पनि साँझ ७ बजेदेखि नै राजधानीमा सवारी पाउन मुस्किल हुन्छ । यसले गर्दा यात्रुहरू महँगो भाडा तिरेर ट्याक्सीमा हिँड्न बाध्य छन् । मादक पदार्थ सेवन गरेर सवारी चलाउनेविरुद्ध ट्राफिक प्रहरीले कारबाही चर्काएपछि रात्रिकालीन रेस्टुराँ व्यवसाय बढी मारमा परेका थिए, घरबाहिर रमाएर फर्किनेलाई विकल्प थिएन । रात्रिबस सञ्चालनपछि यो व्यवसायलाई समेत राहत हुने व्यवसायीको आशा छ । महासंघ र महानगरपालिकाबीच असार १७ गते यससम्बन्धी सम्झौता भएको थियो । काठमाडौं र ललितपुरका आठ रुटमा १४ वटा बस सञ्चालन हुने महानगरपालिकाका प्रशासन तथा संगठन विकास विभाग प्रमुख साधुराम भट्टराईले जानकारी दिए ।

cancel

cancel

cancel

cancel

close

cancel

close

close